荷李活男星占美霍士（JamieFoxx）憑喺《Ray》入面扮演本屆格林美囊括八大獎嘅已故騷靈歌王RayCharles，直搗今屆奧斯卡，呢部感人又精采嘅音樂電影下星期四喺本地上映。導演泰萊赫福（TaylorHackford）日前接受訪問時話好難忘Ray生前同占美一齊jam歌嘅情景。
泰萊十幾年前已經想拍呢齣戲，佢話：「我八八年首次同Ray見面，同佢傾拍電影嘅事，最初未有電影公司肯投資，最後要等十五年後先開拍到。劇本完成後，就畀Ray批核，可惜Ray最終等唔到電影上映便去世。」
泰萊又話同Ray合作嘅日子好難忘：「喺開拍前我帶占美去見Ray，Ray摸吓占美隻手，感受吓佢係咪識彈琴，之後兩個人重一齊jam歌，簡直歎為觀止。」
泰萊又讚占美扮演Ray落咗唔少苦功，除咗模仿Ray嘅言談舉止之外，又入讀盲人學校同每日十二小時遮蔽雙眼嚟熟習失明嘅感覺。
Ray雖然喺樂壇成就輝煌，但原來佢嘅身世非常可憐。佢出生喺三十年代經濟大蕭條嘅喬治亞州，五歲嗰年親眼睇住細佬佐治溺斃，後來Ray因為患咗青光眼而逐漸喪失視力，加上屋企好窮，七歲時已完全失明。Ray喺十七歲時毅然登上長途巴士到西雅圖追尋夢想，點知俾酒吧老闆娘呃，之後又淪為佢嘅洩慾工具，真係坎坷。