今日係留喺克利夫蘭嘅最後一日，聽日一早就要飛去丹佛直擊明星賽，所以趁食飽後又未夠鐘睇波，就試吓行啲比較人迹罕至嘅街舖，睇吓會唔會有滄海遺珠啦。
點知真係行咗成半個鐘後我重係一冇所獲。行到街尾見有間唔起眼嘅運動舖，咁即管入去睇吓。一打開門，舖頭裏面竟有成大班小朋友喺度走嚟走去，搞到我以為自己去咗遊樂場！入到最入嘅鞋架，先知點解成間舖塞滿「豆𡃁」：原來呢間係BB鞋專門店，大大話話有成過一百五十對BB波鞋任你揀；跟住一個亞裔嘅老闆娘就走埋問我係咪日本人，重話假如係同鄉的話再有九折。可惜只係識講日文多謝、早晨同「也媽嗲」嘅我，惟有同佢講聲早晨之後，就直認自己由香港嚟。
千挑萬選之後，我買咗幾對鞋仔預備走人，點知畀錢時竟然見到收銀機後面有一大堆最新出爐嘅AJXX波鞋仔，梗係即時問老闆娘可唔可以賣畀我；開頭佢死都唔肯，重話對鞋應該禮拜六先至上架，咁早賣唔啱規矩。佢見我死纏爛打，先肯賣一對畀我，重問我個仔幾大，要咩size。於是我忍住笑話BB未出世，買定先；如是者，呢對極靚嘅AJXXBB鞋，就率先畀我得手啦！