裕泰興西半山翠麗軒，錄得首宗大手成交，買家係三個外籍機師，共用四千八萬，買入七個單位，平均每呎六千，其中頂層特色戶，呎價超過八千五。佢哋計劃每人住一個，另外四件收租。
翠麗軒餘貨明日內購，獨家代理中記話，收飛二百幾，八成買家外籍，破天荒大比數多過地頭蟲。
個盤咁受老外鍾情，主因位處佢哋最熟悉嘅西半山。絕大部份入飛者，至少做咗呢區租客三年，得知附近有新盤賣，就即時向代理入飛，一半打算轉租為買，其餘打算長線出租。
中原西半山聯席董事李巍話，唔好以為洋人唔了解本地樓市，佢哋睇好個盤位近中區及蘭桂坊，唔憂租，一邊攞公司福利租樓住；另一邊買樓投資，比唔少港人更加精明。
雖然話豪宅市道好，但始終係豪宅，銀碼大，成交量當然唔及中細價樓，為咗推動豪客入市，發展商雞年展開加佣行動，催谷代理落力推銷。
恒隆尖沙嘴君臨天下，原先畀一個至個半佣，噚日就加到兩個。促成單位，額外得樓價半個巴仙獎金，都幾和味。
再度推銷嘅長沙灣郝德傑山，聽聞，佣金由百分之一點二五，加至百分之一點七五。
豪宅價格係咁升，唔少豪客舊年入咗市，喺未有焦點豪宅盤推出之前，惟有靠加佣，增添入市動力。
農曆新年，雖說樓市傳統淡季，不過，二手樓照樣密密有成交。
世紀21李志江話，過年之前，有個尹姓投資者，連環掃入藍田、將軍澳居屋，其中三間，農曆新年期間出貨，升值超過兩成，每件賺二十六萬至三十四萬，總共八十八萬。
剛剛踏入新一年就賺錢，已經係好兆頭，連銀碼都咁好意頭，認真難得。
李志江話，尹先生三個月前開始入市，共買咗二十三件貨，包括居屋同埋觀塘麗港城呢類私人樓，經過裝修就陸續放售，成交咗嗰三件，共用十萬裝修，然後出售。至於剩番嘅二十個，會繼續出貨，預計可賺一成半。
銅鑼灣係零售消費旺點，區內黃金廣場，一至三樓將變身「潮流坊」，分間七十八個舖，由六十六至全層六千餘呎。縱橫商業顧問陳家齊話，一樓平均呎租約一百蚊、二樓約九十、三樓七十五。
目標租戶係至潮時裝、服裝飾物以及精品店。商場重有扶手電梯，由地下直達三樓。
聽講，大業主舊年已經為大廈變身做好準備，其中四至六樓，租畀日式食肆。
電郵地址：