金管局高層噚日出席立法會滙報會，雖然係新正頭，但經常同任志剛擦出火花嘅劉慧卿，一樣非常勞氣，伊人話外滙基金有四千幾億累計盈餘，政府又坐擁三千幾億財政儲備，無理由唔攞啲出嚟用之於民。任總反駁話，如果要用晒筆財政儲備，加埋累計盈餘，唔係話唔得，但宜審慎行事。
卿姐即刻冒火，向主席投訴任總，自己無講過要用晒啲錢，叫佢唔好學埋啲局長咁，扭轉說話嚟講，搞到好似劉慧卿令港元不穩，「年初九咁講唔好，幾時咁講都唔好，好唔友善」。
跟住輪到李卓人發炮，指任志剛成日話調撥盈餘係財爺權力，但佢又唔提出建議；阿人話：「財爺都要問你攞利是，你先係財神」，又指佢對捍衞港元，愈多儲備愈好嘅邏輯，等同布殊及金正日，保留愈多核彈愈好。咁嘅比喻虧佢諗得到。
（圖）任志剛喺新正頭就同劉慧卿擦出火花。
傳真︰2623-9278
電郵︰