自由黨噚日團拜，主席田北俊剛從歐洲返港，佢話絕對有信心今年經濟會比舊年好，做生意賺多啲，打工仔有人工加。
講兩講，大家發現佢個嘴腫咗，於是田少自己招供，話唔關老婆Mary事，只係佢哋去滑雪曬襯。
田少咁樂觀，佢位同黨方剛，亦預期今年零售市道好轉，方剛同記者新春茶敍時實牙實齒話，今年四月就會加人工，加幅係百分之三至五，大家聽住啦，如果啲無良酒樓老闆好似佢咁有承擔就好啦。
方剛同唐唐一樣都係上海幫，不過方剛話，佢細細個方家上下已搬晒嚟香港，上海冇晒親戚，過年都唔使返鄉下，所以佢已經係成個香港人。
唐唐話佢上水有田可告老，方剛就話自己一塊田都冇，不過可以租咗唐唐嗰塊嚟「告老歸田」！方剛都算用心良苦，租咗唐唐塊田，等佢退休無處可去，迫住要更上一層樓──做第三屆特首。
傳真︰2623-9278
電郵︰