恒指再跌47點，收市略低於萬四。連續4日喺萬四關反覆，暫時都係上落拉鋸。
和黃C輪3561：和黃（013）收70.25元，跌0.75元，有成交嘅和黃C輪，冇1隻唔跌。和黃同大市一樣，暫時反反覆覆，每次下跌，都有機會彈番上去，但唔適宜期望即時有好勁嘅升幅，情況如此，炒輪就適宜炒上落，低買高賣。和黃C輪3561係主角，上周五最低0.405元，本周二話咁快最高見48仙（升19%），昨日話咁快見番上周五低位，收41.5仙，又到低買時刻。買完之後，執10-15%可落車，實行密食當三番。
3561喺6月中到期，輪價41.5仙，溢價2.7%，槓桿率16.9倍（有效10倍），引伸波幅22.2%，呢件可視為正選。3808買賣較3561更旺，7月中到期，輪價52仙，溢價2.8%，槓桿率13.5倍（有效8.5倍），引伸波幅22%。兩者相較，都係3561靚啲。
新地C輪4643：新地（016）收72.25元，跌0.5元，個勢屬於反覆向上，低價宜收集C輪。新地C輪最靚係4643，6月初夠鐘，輪價40仙，溢價2.4%，槓桿率18.1倍（有效11.2倍），引伸波幅19.7%。
論交投，3797旺過4643，但數據則係4643靚好多。4643壽命短8個禮拜，但有效槓桿率大兩成，而溢價則慳番2.9個百分點。
恒指C輪3700：恒指收13967，低過萬四點只係33點，若再偏離萬四點多啲，博反彈，可買恒指C輪3700。
章盛