學生Ｃ近日頻頻刨英文，回復會考、高考時期，揸住英文課本唔放手，問佢：「你在大學主修工程，做乜刨英文刨得咁緊張？」學生Ｃ話：「我今年五月就會畢業，畢業前要考IELTS，攞得低分就好難搵工㗎嘞，讀咗三年工程，一年實習，平時計數多，做嘢多，比較少揸起枝筆作文，我最驚就係呢一味！」左丁山問：「好似IELTS唔係必考㗎，自願性質之嘛。」學生Ｃ苦笑：「你唔好開玩笑，名係自願，但當每年有七八千大學生去考之時，我唔考就好蝕底。考到六點五分就可以考政府工之時，免考英文，梗係要博一博啦。」
據田北辰講，香港嘅大學生考呢個試，平均成績唔曳，平均有六分以上，考到八至九分嘅（九分滿分）亦大有人在，不過工程系的學生平時對英文少啲注意，臨急惡補亦好應該。
以往大學畢業，英文程度冇人會懷疑，如今卻要離校前考一次英文試，大家心照嘞。無獨有偶，英文水平下降，非香港獨有現象。學生Ｃ嘅中學同學去咗加州讀CSU（加州州立大學，有好多間分校），畢業前一定強逼性要考一個（WST，WritingSkillTest），最難嘅部份係寫一篇五百字文章。學生Ｃ啲同學亦係修讀工程、電腦、設計之類，玩電腦玩到識飛，但考WST就肥咗兩次，唔及格就攞唔到大學畢業證書，認真煩，但好難得嘅係，啲學生冇集體抗議，冇人笑CSU噃。
照左丁山話，香港嘅大學生為咗證明自己嘅雙語能力，除咗英文考IELTS之外，母語中文亦應該考一次WST，向CSU看齊。香港學生固然要着重英文，但對中文重視程度唔夠，點會夠競爭力！