近日影帝柯俊雄終於正式同女星張美瑤結束長達三十五年嘅婚姻關係，而佢同服裝設計師蔡青樺十多年嘅地下情亦隨之被踢爆。
據最新一期台灣《壹週刊》報道，喺啱啱過咗嘅情人節，柯、蔡二人雖然前後腳出席活動，但最後兩個人係坐同一架車走。據知，蔡青樺喺自己名下嘅駿繕企業有限公司擔任董事長，而柯俊雄就擔任總經理一職。
雖然舊年十二月柯俊雄競逐台灣立委投票前一晚，有「寶島玉女」之稱嘅張美瑤同囡囡柯品吟都有現身支持柯俊雄，不過有傳呢一個係張美瑤用嚟同柯俊雄離婚嘅交換條件。
其實張美瑤喺○二年嘅時候已經同傳媒講過想離婚，不過男方一直為咗形象問題而唔應承。另外，令到張美瑤決心要離婚嘅原因，原來係柯俊雄同蔡青樺已經一齊十幾年，而且柯、蔡兩人嘅私生子𠵱家都讀緊中學啦，所以張美瑤覺得都係時候結束呢段婚姻。
何超儀近排簽咗林建岳旗下嘅紅館經理人公司，佢前晚都有到尖沙嘴出席寰亞電影春茗，佢老竇何鴻燊亦好畀面個女，帶埋四姨太一齊到場。超儀比老竇遲到，佢一到場，林建岳就拉埋何鴻燊一齊出嚟大合照。超儀話：「我簽紅館因為佢哋電影公司拍戲好有質素。」超儀又話佢老竇知道佢憑《蝴蝶》入圍金紫荊獎最佳女主角，重大讚佢叻女，超儀話：「不過我唔敢叫佢睇部戲，因為演出都幾大膽。」
鍾嘉欣噚日去咗中環為一化妝品店做模特兒，宣傳新一季化妝產品，佢話：「我細個時覺得唔需要化妝，𠵱家入咗行先至開始化妝，我平時都會自己化，手勢熟咗半個鐘就得。」鍾嘉欣媽咪會喺月尾嚟香港，佢話：「佢到時可以煲湯畀我飲，而且我𠵱家成日喺機場拍劇，我都想帶佢周圍睇吓。」
鄧健泓前晚擔任化妝品店周年晚會表演嘉賓，佢話已經計劃好將來動向，鄧健泓話：「我同無綫重有十一個月約，我都想唱歌，但唔知公司肯唔肯，不過一切都尊重無綫。」對於方力申同鍾欣桐同遊瑞士，佢就話：「之前方力申都問過我去唔去瑞士，但我要開工，我乜都唔知，唔好問我啦。」
黃秋生前晚出席寰亞春茗，佢透露新一年將會拍幾部戲，九月重會同鄭裕玲（嘟嘟）一齊做舞台劇，秋生話：「我哋做嘅係莎士比亞名著《馴悍記》，其實我好多年前都同鄭裕玲合作過《我愛扭紋柴》，不過當年我只係企側邊，睇佢做戲啫，學到好多嘢㗎，鄭裕玲好靚。」
葉世榮噚日去商台接受《叱咤樂壇》訪問，佢話Beyond會喺四月起程到美加，之後再到北京、天津、哈爾濱同西安等地舉行巡迴演唱會。
世榮又話近日除咗忙於為自己嘅新大碟寫歌外，重會為幾隊樂隊擔任經理人，佢話：「我簽咗兩隊新樂隊Ever同DSC，重簽咗一個二十幾歲嘅日本創作歌手寺岡俊作。」
