大市繼續在高位整固，恒指在100點的窄幅內上落，收市13967，跌47點，期指高水23點。大市升後調整，估計會維持多兩三日，下禮拜可望衝破14000點大關，向高位推進。
中信21世紀（241）收2.75元，升7.8%，今日連輪權最後買賣，相信股價會有進一步表現。彩星（635）收1.90元，逆市而升3仙，本周二急升後，在1.90元水平已整固兩日，噚日成交亦縮到得670萬股，阻力在1.91元，若升破，短線目標2.15元。
遠東發展（035）個勢好強，收3.275元，升近4%，股價已重上3條平均線之上，現時最大阻力係前兩個高位的3.55元，今次係第3次衝關，呢兩日成交大增到超過3000萬股，顯示動力已開始凝聚，若成功破位而上，上升大浪確認，短期目標4.10元，中線可見5字頭。
上月底推介過遠展，當時股價3.10元，家吓只上升5%，重可低吸。大陸地產股呢輪個勢好勁，因為樓價嘅升勢同埋去貨嘅速度比預期佳。遠展發展地產，主要係在上海、廣州同成都；上海的錦秋加州花園，已經成為集團嘅金雞（年年生金蛋），由於樓價係咁升，成個「波蓆」嘅利潤亦愈來愈可觀。
加州花園待發展單位有5000多個，別墅樓價已逾1萬元1方米，高層豪宅每方米亦賣7000元，呢個價錢，比去年又升多20%。為配合加州花園地鐵車站06年底落成，集團已計劃今年內推出1200個住宅同商業單位，預期可為06年度（3月年結）及07年度分別帶來4至5億元的除稅後收益。
現年度（05年3月年結），估計遠展盈利4.5億元，每股加權盈利0.37元；06年度，盈利會再大升到6.5億元，每股盈利0.47元；07年度，計入廣州同成都項目提供的收益，以及澳洲同紐約發展項目的分帳，估計盈利可上升到10億元，每股盈利約0.68元（已計入換股票據行使的因素），以10倍PE計，1年目標價為6.80元，股價在現水平可再翻一番，而整間遠展的市值，亦可實現管理層100億元的願望。
2008年開始，澳門賭場酒店項目提供貢獻，估計年收益逾5億元，股價可再進一步上升。
郭兆誠