情人節啱啱過去，一向只醉心扶貧工作、從未傳過緋聞嘅社區組織協會主任何喜華，竟然俾人當面踢爆佢最近行緊蜜運，重一腳踏兩船㖭！究竟係邊個令何喜華咁難取捨？咪就係佢最關心嘅窮人囉。
由社協、前綫等十二個團體組成嘅民間關注扶貧聯席噚日開記者會「晒馬」，發言人立法會議員劉慧卿講明會睇實由財爺唐英年領導嘅扶貧委員會，昅實佢哋有冇畀心機扶貧。
卿姐又笑笑口話，何喜華既係聯席一分子，又身兼扶貧委員會成員，簡直係一腳踏兩船，搞到何喜華臉紅紅鬼咁尷尬，佢話大家對扶貧委員會咁有要求，佢都係快啲退會為妙。未開會就想縮沙，唔通何喜華對呢個委員會冇乜期望？聯席第一炮係要爭取扶貧委員會舉行公開會議，何喜華話如果委員會唔答應呢個要求，佢自己都會將所有開會文件公開，實行增加透明度咁話。
（圖）十二個團體組成嘅民間關注扶貧聯席，要求扶貧委員會定下十年滅貧目標。右三為何喜華。區民傑攝
傳真︰2623-9278
電郵︰