八方噚日去台灣駐港最高機構中華旅行社喺君悅舉行嘅乙酉年新春酒會，見到民主黨嘅達仔、張文光同單仲偕，不過，一個特區高官都唔見。
總經理鮑正鋼話，佢哋當然有請啦，但係好似冇人賞面。鮑正鋼嚟香港履職快四個月，佢話重未正式見過林瑞麟局長，佢希望雞年台港兩地多啲從正面發展，負面自然減少。
鮑總對香港印象好好，香港有山有水，氣候又好，人亦好善良。香港咁好，所以新春期間冇返台灣，好彩留咗係度，因為香港都發生有過百台商喺年尾滯留機場事件，佢一知道就通知華航嚟接人，所以冇鬧大件事。
光華文化中心主任路平（圖）亦有上台祝酒，原來路小姐有一本名為《點滴纏綿》嘅新書快要出版，載嘅都係香港所見所聞，佢又話，今年係好年，台灣冇選舉，兩岸關係會有更多融合，而香港亦應向上走啦。
傳真︰2623-9278
電郵︰