民建聯及港進聯終於宣布媾合，六月生效！兩個老嘢，無論個樣同性格，都唔知有咩唔同，一個挺董（不過最近見壽爺面色變，經已開始棄船），一個保皇（不過保唔保皇都冇乜人理，因為冇選民），就似工聯會同維園阿伯黨，合併唔合併都係同一幫，正如前新華社社長周南話頭，甚麼愛國愛港，來來去去都係那班人，所以香港市民都係覺得英國嘅差利仔同皺皮王妃卡米拉攜手入洞房好睇啲！
正所謂負負得負，都好嘅，等啲選民了解清楚。雙方媾合之後，全名水蛇春咁長，叫做「民主建港協進聯盟」。咁八方想請教吓：呢兩個「黨」，只識附和中方，主人話○七、○八冇普選，佢就大聲搖尾嗌YesSir，反民主敗港就有，點樣「民主建港」？何來「協進」？共退就有之！
講到着數，就梗係港進聯Lam多好多嘢！皆因為在去年九月立法會選舉前，親中各黨位位都有得上北京謁見最高主人紅曾，連自由黨田不俊都有份，獨係親中嗌YesSir速度反應最快、迴音最大嘅港進聯冇，不只冇，連紅曾都睇佢唔上眼，叫其頭目劉漢銓朱幼麟等人退選，唔好阻住民建聯等土共親中派搶北角啲選票㖭！
紅曾有令，下一步港進聯就梗係等執包袱。點知主人可能覺得執笠冇面，不如「合併」，兩塊牀板拼作一張，貼一個「囍」字，就當堂好似茶餐廳收購大牌檔咁，到頭來，梗係開大牌檔嘅九叔執到，因為從此唔使再喺後巷對住啲老鼠曱甴，假假哋都有得黐吓空調吖嗎？
所以兩幫合流，若然地位均等，應該叫「民協聯」，但主婚人阿爺話事，「民建聯」簡稱不變，不過就僭建多個生銹簷篷。一間茶餐廳同一間大牌檔，賣嘅都係嗰幾碗豬雜、牛丸、魚蛋，啲料一樣係用對赤腳喺後面廚房用力嚟踩，咁又點樣「互補」呢？八方𢱑晒頭。不過咁，飲食市場啲下價豬雜牛丸，點都有啲維園阿伯基層客，話唔定食吓食吓，嘔幾嘢，會幫襯咗個特首出嚟㖭，到時外資走唔走，又另一回事囉。
民建聯同港進聯都合併咯，放眼世界，睇遠啲，唔知北韓同古巴，又幾時可以合併呢？叫做「鮮巴聯盟人民民主新型共和國」，由金正日做總統，卡斯特羅做皇帝呢，壽爺得閒，都諗諗佢吖。
傳真︰2623-9278
電郵︰