第七十七屆奧斯卡電影頒獎典禮將會喺本月二十七日於洛杉磯舉行，好多人都好期待呢個頒獎禮，因為奧斯卡除咗係一年一度嘅影壇盛事外，亦都係一場最精采嘅時裝表演。秉承過往嘅傳統，前日奧斯卡大會喺比華利山舉行咗場奧斯卡時裝預演，預覽今年奧斯卡嘅時裝趨勢，當日模特兒着上色彩繽紛嘅禮服出現，令人目不暇給。