世界基因權威嘅港大校長徐立之噚日頒發港大長期服務獎時，就話自己斷估都攞唔到呢個獎，因為一般校長最多做十年，要攞獎就必須超過十五年。不過為配合大學嘅長遠發展，校長要做十年先夠，重話唔知港大將來肯唔肯同佢續約㖭。
講番個長期服務獎，今次總共有一百六十六位員工有獎攞，係歷年最多。其中有個原來係沙士幕後英雄，佢就係做咗成四十一年嘅郭祺爵，係微生物學系實驗室助理員，負責驗瑪麗醫院病人嘅大小二便。佢話沙士嗰陣都驚自己會染病，不過為咗維持醫院日常運作，佢唔會做逃兵，繼續返工同混喺大小便嘅病毒作戰。系主任袁國勇都成日提醒佢，注意清潔，多啲洗手，安全緊要。
（圖）郭祺爵（左）話沙士嗰陣，系主任袁國勇（右）成日提佢要洗手。
傳真︰2623-9278
電郵︰