大市繼續在高位爭持，恒指收14015，升19點，成交略多，有170億元，期指平水，大戶同基金繼續收貨，散戶多持觀望，14000關整固完成後，料可向14200至14400推進。
中信21世紀（241）發售認股證，優先讓股東認購，條件係6供1，每份作價0.1元，行使價2.40元，明日（18日）係連證買賣嘅最後日期。
21世紀噚日收2.55元，估計窩輪上市後，輪價應該唔會低過0.60元。
窩輪作價0.10元，係象徵式收費，實際同送輪無異，公司此舉明益股東，讓股東可以更靈活地處理投資，分享公司未來發展的成果。21世紀前景看好，股價上升，窩輪價亦會水漲船高。
21世紀係北京中信集團發展電訊科技增值業務的旗艦，最近又同國家質檢局合作，成立中國產品質量電子監督網（質檢網），總投資1.4億元人民幣，集團佔50%權益，國家質檢中心及中國電信分佔30%及20%權益。
今次係繼鴻聯九五（佔49%）及東方口岸科技（30%）後，另一項注資行動。
今次注資，對公司影響可大可小，因為質檢網開通後（傳已定3月29日為佳期），收益可能會好可觀。21世紀家吓市值成80億元，但若日後幾個網嘅收益去到10億元，以高增長股PE15倍計，股價有機會在現水平再翻一番。
質檢網係好值得寄予較大嘅期望，點解？因為質檢網日後有兩瓣主要嘅收益，一係來自生產商，另一就係來自消費者；前者除向每一生產商會員徵收「入網費」外，據聞收費重會同生產商的營業額掛鈎，後者係按每次查詢收費，此部份會與中電信拆帳。
事實上，質檢網開通後，由於所有產品須加裝防偽條碼，消費者可即時查詢到產品的真偽，而生產商可立即知道假貨的資料，質檢局亦可配合進行打假行動。中國商品登記何止千千萬萬，而年營業額又以百萬億元計，質檢網日後的收入係「大」抑或「小」，相信大家心裏有數。
21世紀股價近日升上2.50元水平反覆，噚日高收2.55元，有迹象整固會完成，破2.55元阻力，短期量度升幅目標係3.0元。
郭兆誠