喻為香港豪宅代表嘅薄扶林貝沙灣，住客會所啟用。佔地八萬呎嘅一期會所，各式各樣設施包羅萬有，貫徹豪宅格調、豪華包裝色彩。
住戶用積分就可使用各種設施，例如超級跑車法拉利、保時捷等，重有水療按摩與美容服務。
盈大重照顧到繁忙都市人容易失眠嘅問題，專程引入幾部美國製造、價值十萬嘅太空椅，只要安坐十五分鐘，頓時進入鬆弛嘅休息狀態。
元朗新盤悅富豪苑，知名度一般，但吸引到住開九龍嘅歌星蕭正楠（圖三）青睞，初七參觀示範單位後，一次過用六百四十五萬，買入兩個單位，包括地下複式與頂層連天台單位，共二千二百幾呎，呎價二千九百幾。
中記龍智烽話，蕭正楠計劃複式自用，得閒入去住吓，頂層招租，預計每月袋八千。
每年歲晚至新春，商場業主都大搞活動，幫租戶谷生意。
地鐵呢個黃金檔期，喺九龍灣德福廣場及青衣城商場，舉辦「公益慈善遊樂園」籌款，初七晚請嚟粵劇名伶蓋鳴暉，義演「獅吼記」。
聽講，票價一百至一千，一早喺月初已經賣晒。
其間籌到一百萬，由地鐵物業總監何恒光交畀公益金。
喺農曆年前，德福每日人流達到二十六萬至二十八萬人次，青衣城就有十二萬。
新春期間，團拜春茗零舍多，成立半年嘅藍田世紀21聯誠，揀初七新春團拜，高級經理李志光話，請嚟銀行、律師行等友好，幫襯開嘅投資者，都有畀面捧場。
較為人熟識有近年轉高調嘅鬍鬚余，及謝姓同梁姓孖寶投資者。呢對孖寶，喺藍田、紅磡、尖沙嘴漾日居都有投資，對象包括住宅與車位。
另外，屯門地膽祥益都喺初七春茗，順道慶祝邁向二十三周年。
電郵地址：
