香港地方細，公共交通工具配套又完善，所以冇私家車都唔緊要；但喺美國冇架車真係去邊都成問題，所以的士就變成最好的幫手。估唔到嘅係，今次會喺克利夫蘭遇上一個如此好嘅的士司機。
噚日call的士去一頗遠嘅商場逛；那位叫Roberts嘅司機談吐非常斯文有禮，令人好有好感。途中佢一面介紹克利夫蘭，一面問我喺邊度嚟。當 知道我由香港過嚟採訪NBA，就問我係咪好鍾意籃球，我當然話係啦！佢重即刻車我去個最多籃球用品嘅Mall；我梗係求之不得啦。
可能始終未到All-Star的關係，所以喺商場唔見有乜有關明星賽嘅大搞作或者特別宣傳，最大就係Reebok剛推出嘅明星賽特別色Pump球鞋，以及占士及麥基迪等球星嘅明星賽戰衣。
到我逛完走嘅時候，Roberts再嚟接我，重準備啲紀念品送畀我；打開一睇，原來係一個籃球形狀嘅朱古力，中間重夾住張騎士嘅波飛；Roberts話知我鍾意籃球，所以送畀我留念。
到落車嘅時候，Roberts又塞咗個「冬甩」畀我，重話食個KrispyKreme呢個牌子嘅「冬甩」，先算嚟過美國。
此情此景，我當然千多萬謝啦，而且內心亦好感動；咁敬業樂業嘅好司機，真係萬中無一難遇！