公關小ＹＹ變咗酒店小ＹＹ之後，在倫敦著名酒店工作咗一年，認為要擴闊視野，累積經驗，接觸國際一流服務水平，走咗去紐約搵工，掂咗，已經在年初飛去紐約上班。紐約求才若渴，歡迎各方人才，但美國工作簽證好難攞，二○○五年嘅工作簽證（六萬五千份），去年十月一開始申請，一日之內發完，想去美國打工者，請等候至今年十月（以上據《金融時報》報道）。酒店律師為小ＹＹ搞培訓簽證，為期一年半，就一定要離開美國，冇得留低。不過冇所謂吖，一年半後酒店小ＹＹ已經累積相當經驗，返嚟亞洲搵工咯。
去到紐約，搵地方住就頭痛到極，因酒店分三更制，深夜、凌晨放工，單身女仔唔多方便，所以要住曼哈頓，離開酒店十分鐘車程左右。嘩，曼哈頓啲租貴咯，一個單人房住宅，月租一千七百美元，外國人初來甫到，冇人擔保，要交三個月按金，三個月上期，一個月經紀佣金，買若干傢俬，先至可以搬入去住，加加埋埋，大嗱嗱要拎成十萬港幣，先至搵到地方落腳，酒店小ＹＹ打工幾年儲蓄起嚟嘅錢，一鋪清倉。
小ＹＹ話：「每個星期出糧，扣咗工會會費、醫療保險、社會保障、入息稅，所餘無幾，再要月底交租，根本荷包窿丁，每日一餐食酒店嘅，食第二餐都冇錢，交通費等等，惟有望天打卦靠人客貼士，所以我對人客好有禮貌㗎！」
酒店工，人工低，工時長，人客歡愉歎世界之時（例如新年狂歡），就係酒店夥計忙得不可開交之時，諗落都唔知有邊處最吸引，不過人各有志，小ＹＹ選咗呢條路，惟有搏命，希望做到最好。