港台每年新春團拜，例必熱鬧，今年重勁，除咗各大電子傳媒高層同埋高官捧場外，重有俾政府用嚟sell香港用到爛晒嘅中式米奇同美妮。
今年主禮嘉賓係財爺唐英年，唐司長以《易經》同大家拜年，佢話《易經》第一卦係乾卦，而乾卦第一句係「天行健，君子以自強不息」，大意即係人應該不停地努力改進、充實自己，佢希望全港各界未來一年能以「自強不息」呢四個字時刻共勉。不過如果由八方解，呢個「自強不息」卦象簡單啲講，即係未來一年大家都係要靠自己雙手，千祈唔好旨意我哋偉大嘅董特首同埋一班擁極高智慧嘅高官囉！
財爺噚日亦都去咗屯門旅港增城同鄉會兆霖學校，聽吓義工講「非常課託計劃」嘅情況，重同班小朋友分享學英文嘅心得。唐唐話自己細個時候啲英文都唔叻，學好英文係靠每日抽少少時間，睇英文電視節目，日子有功。班小朋友又不妨試試，睇吓財爺嘅秘訣使唔使得。
傳真︰2623-9278
電郵︰