踏入雞年，皇冠車行旗下品牌新車可謂一浪緊接一浪，繼大發Sirion同豐田Hiace車系之後，旋即又有最新版凌志GS車系登場。
北美新版忽然到港
由於車行要因應個別車款的市場策略需要，故此押後豐田新版Vitz（即港版Echo）到港時間，至於話全新凌志GS系忽然到港，確實令筆者有點意外，事關廠方早前透露，全新凌志GS車系，快者都要今年8月才正式面世嘛！及後，經筆者查探過，今趟抵港的凌志GS新車，屬出口北美新版，當中既有全新GS350（3.5公升V6引擎）型號，又有頂級版的GS430（4.3公升V8引擎）。
革新面貌238匹
據知，下個星期五首個新聞發布會率先跟本地傳媒見面的車系，會是GS350（馬力238匹），全車既有革新面貌之餘，還透現出一股時尚的高級轎跑車美態，好適合時下用家的新口味，但有關新車細節詳情，相信要待下周五凌志GS350發布會後，筆者再逐一細數畀大家知道。
記者：陳偉林