方中信同莫可欣相戀多年，感情一向穩定，但噚日有網頁報道，有人報料話喺情人節當日，目擊方中信搭飛機由香港到青島密會秘密情人，連佢當日搭邊班機同幾點到埗都寫埋出嚟。個報料者話嗰日方中信身穿黑色風褸，攞住個黑色行李篋步出青島機場後，就上咗友人準備嘅房車直達下榻嘅酒店。
報道又話方中信一直瞞住莫可欣，每年都會去青島幾次，每次逗留四至五日，以慰神秘女友相思之苦。而今年情人節，方中信正係趁莫可欣去咗泰國拍戲，偷偷會情人。馮仁昭噚日打畀莫可欣，佢聽到單料後，第一個反應係哈哈大笑，佢話：「咁衰？等我返去打佢屁股！」
莫可欣話方中信情人節係去咗哈爾濱剪綵，佢哋之前重食飯慶祝，方中信重喺情人節翌日搵人送花𠱁莫可欣，莫可欣又話：「如果佢咁叻收得埋第二個，咪由佢囉，唔好煩到我就得，而且做呢行邊收得埋嘢㗎！」問莫可欣有冇打算結婚？佢話：「有諗，但冇計劃，呢啲嘢冇理由我開口嘛！」
鄭欣宜喺加拿大演出節目《四海一心加港情》搶盡風頭，佢老竇鄭少秋噚日就同太太官晶華喺台灣度歲後返港，重有幾位fans喺機場接機，秋官好識做咁向fans大派利是。講到愛女欣宜，秋官好開心咁話好彩冇份去加拿大表演，否則俾個女搶晒風頭咪好失威？秋官真係好鬼風趣！
孫燕姿雖然係新加坡人，不過佢喺台灣都有頭家，間屋有四房兩廳，裝修唔算華麗，但周圍都擺晒歌迷送畀佢嘅公仔，佢重將其中一個歌迷送嘅胸圍形咕𠱸放喺客廳梳化，孫燕姿講笑話歌迷嘅心意可能係想佢嘅胸部大啲。而每次執屋令佢最頭痛嘅事，就係執拾好似成堆山咁高嘅鞋。
胡兵早前喺東京舉行「亞細亞胡兵LOVINGJAPAN」演唱會，不過佢到日本時就發生咗段小風波，原來佢嘅日本簽證過咗期，被海關人員帶到辦公室，點知原來海關嘅太太係胡兵fans，所以胡兵只要簽個大名，就獲發一張三個月嘅臨時簽證。而胡兵喺演唱會唱咗首《我只在乎你》獻畀師傅羅文。
台灣樂隊五月天前晚喺台北飛去美國，為洛杉磯同聖荷西舉行嘅兩場演唱會做準備，不過五月天除咗帶樂器之外，其他幾乎都係冇裝嘢嘅「吉篋」，佢哋話因為美國正值減價，所以打算到埗後瘋狂購物，啲篋要嚟裝戰利品。
五月天重話個唱後會去拉斯維加斯賭場，睇吓有冇機會發新年財。
新人鄭俊弘早幾日喺銅鑼灣一間髮型屋出現，馮仁昭覺得佢面善，諗起佢喺劇集《青出於藍》中演郭可盈嘅學生，原來鄭俊弘係無綫訓練班出身嘅藝員，出道都有三年，但都係做閒角，𠵱家拍緊《脂胭水粉》，飾演黎姿個細佬，佢話之前拍《青出於藍》，好多謝秦沛教咗佢好多嘢，教佢做戲時要好似日常生活咁，最緊要夠自然。
