嫻姐今年雖然冇犯太歲，但認真唔好彩，開年冇耐就跌親，塊右邊面瘀咗一撻，右邊手腳都跌傷埋。
八方噚日同嫻姐、王國興同鄺大狀哋飯局，嫻姐真係跌得好傷，就連夾餸都要就住就住咁。佢同八方講，年初三佢一個人喺灣仔行山，落斜嘅時候就一路行、一路跳，但跳跳吓突然失咗平衡，搞到成個人「拜大佛」咁扒咗落地，膝頭哥流血，手腳面都冇一幸免。返到屋企就俾家姐話咗兩句，提佢唔細啦，唔好再跳。
王國興同鄺大狀都係噚日先知嫻姐跌傷，不過，嫻姐話，佢已經好番好多，噚日都有去立法會開會。
嫻姐鍾意行山，連兩位工聯會嘅立會議員都受影響。話說當日聽完老董施政報告後，大家都覺得好納悶，嫻姐提議去山頂盧吉道行個圈，果然舒服晒，自此之後佢哋三個一得閒就成日行山頂，一邊行、一邊諗吓啲嘢點做，效果都相當唔錯，希望嫻姐早日好番，今次跌親係跌晒啲衰運啦！
傳真︰2623-9278
電郵︰