每年採訪NBA，出發之前，都總有唔少朋友問我可唔可以順便幫佢哋攞球星簽名；或者返嚟之後，問我點樣先可以同球星合照；其實呢兩樣嘢，都係唔「合法」㗎。
出去採訪，佩戴得上記者證，基本上你就要夠「專業」；所以要記住合照同攞簽名都係留番畀球迷做，如果唔係就有濫用職權之嫌啦。重記得第一次，到美國採訪，我都重未係好「專業」，喺明星賽訪問環節之後，離遠見到偶像鄧肯，即刻忍唔住走上前叫佢同我合照，佢重即刻搭住我膊頭影相！點知一影完，就俾現場嘅NBA工作人員捉住「省」咗一大輪，搞到我以後都唔敢亂來。
當然，假如喺唔影響別人嘅情形下，合照都唔係咩大問題；有啲球星更加係非常樂意去同你合照㖭！好似今日睇完騎士晨操，搭lift走嗰陣聽到麥堅尼斯叫「等等」，咁咪等埋佢入嚟囉。佢入lift之後，見到我攞住部相機，又望住佢眼都唔眨，就問我係咪要合照；既然人家開到口，拒絕就唔畀面。於是我攞部相機出嚟，點知跟住麥堅尼斯話我手短（因為lift內無其他人，要自己自拍），要幫我揸機㖭；影完又伸個頭埋來睇吓影得靚唔靚，好人之餘，又夠晒鬼馬，抵佢喺克利夫蘭咁受歡迎。