啲人成日問，列文同簡尼係就係老啲（同係三十五歲），但有經驗又有技術，點解德國隊教練奇連士文成日想踢走佢哋。一個字講晒，皆因佢兩個真係好唔掂！
早排俾阿仙奴雪藏、到本月初先從艾蒙尼亞手上搶番個正選位嘅列文，喺前晚贏水晶宮五比一場英超聯出醜，喺接應隊友嘅回傳時撻Q，好彩回身回得切，先至唔使俾個波漏入網。對呢個德國二號龍門熟悉嘅球迷，都知佢唔係第一次揩嘢，之前試過解圍唔湯唔水，搞到俾對手射入。
至於喺德國隊騎住列文嘅拜仁門將簡尼，雖則唔似列文咁成日出醜，但弊在場外生活重鬼咁高調，重俾列文寸佢掛住追啲後生女，疏於練習；而拜仁大前日喺德甲作客輸畀升班馬比勒費爾德一比三，俾史浩克04追至同分，但簡尼佢居然重有心情同女友出席一個慈善首映，唉……。
衰在史特加門神希迪布蘭今屆表現跌watt，奇連士文短期之內睇怕重要靠列文同簡尼。
球證有權秋後算帳
國際足協研究緊新例，就係球員喺入場前如果喺通道打架或鬧球證，球證有權喺吹完場雞後向滋事球員秋後算帳，整張紅牌畀佢哋歎。我求大俠認為咁做好應該，事關可以控制球員嘅情緒，等一啲鍾意喺球員通道搞事嘅球員好似曼聯隊長堅尼同阿仙奴隊長韋拉，唔敢再亂嚟。
李華度臭脾氣唔收
巴西第一代「R」李華度喺希臘奧林比亞高斯踢波，估唔到佢人氣重好盛，該隊本季主場門票已經賣晒！不過，李華度脾氣依然咁臭，先前畀教練換落場發晒老脾，重引起隊友集體嘅反感㖭。嚟緊禮拜四嘅歐洲足協盃就要主場打索察，希望李華度畀心機踢波，唔好發球星脾氣喇！
格朗基亞要踢爭氣波
格朗基亞喺上個月由伯明翰轉會去咗馬德里體育會之後，表現唔錯；佢自己就話覺得呢次轉會令佢有重生嘅感覺，原因除咗自己喺馬體會獲得重用之外，西班牙嘅天氣及食物都比英格蘭好得多。我求大俠都戥佢高興，但係馬體會近期戰績麻麻，希望佢好之餘，幫埋球隊爭佳績嘞。
艾魯列達咪阻人發達
拉科魯尼亞喺一月轉會期跟德甲球隊漢諾威中場迪根斯文，簽妥季後加盟合約，下季將得到呢位加拿大國腳效力。不過拉科教練艾魯列達就話呢次收購係球會高層嘅決定，重批評球會呢個收購唔正確。唉，艾魯列達你都唔獲球會續新約，下季都唔喺度教波啦，又何必阻人發達呢？