新年廢董感冒，做咗山貝河鱷魚，輪到民政事務局局長車公平，代廢董在新春酒會致辭！若然肥平都想做特首，咁新春酒會重要講話，就係北向中方主人交心考牌，橫向地產商表忠嘅試卷咯喎！
可惜，肥平新春致辭，又係廢話連篇！首先，新年流流冧咗棵許願樹，已經大吉利是，肥平屬下嘅民政署，保養不力，工作外判，連許願樹都衰埋，應咗一句，叫做「沉舟側畔千帆過，病樹前頭萬木春」，環顧東亞、泰國、星洲、韓國、印尼，都已在金融風暴後復甦，獨係董團夥統治嘅特區，一病不起，俾啲中央指示，人大釋法等無數赤色「寶牒」，泰山壓頂，搞到統治崩潰，若然論問責，肥平亦要查找不足！
點知肥平不檢討，重反口誣衊市民，話市民只識「埋怨政府，忘記了自己的義務及責任」！好笑喎又，香港人七年來交稅交足，養住董團夥成班蛀米蟲，南亞海嘯捐咗七億，義務及責任經已盡到足！胡錦濤澳門訓政，講到明要董建華及其黨羽一夥，包括七年起哄亂港嘅老左赤共，總結經驗，查找不足，並無要港人檢討！
肥平叫港人「互相適應，互相諒解」！換咗民主社會，廢董蛀米蛀足七年，一早要滾蛋落台，畀你班嘢在台上胡混，白支人工，包括肥平在內，甚麼「高官問責」，甚麼「執政聯盟」，八萬五，高科技港，一概破產，肥平自己唔問責，亦拒絕查找不足，反將責任推晒畀港人，都咪話唔無恥喎！
廢董口口聲聲話改善營商環境，開在旺角娼妓區嘅「朗豪坊」，警方服務地產商，洗太平地捉雞掃黃，點知朗豪坊UA戲院，三個部門一直未有發牌，議而不決，辦事拖混，搞到堂堂UA知名戲院集團，變咗非法經營，請問肥平，呢啲關市民嘅「義務」同「責任」屁事？
殖民地時代，香港狂生金蛋，到咗中方及廢董手上，即時變咗隻病鵝，肥平唔好問港人點解，佢應該問吓廢董、老江、壽爺等人點解。廢董七年敗港，劣績斑斑，新春酒會，因病缺席，無面目見江東父老，就變咗肥平出來死頂，結果肥平就噏咗篇咁嘢出嚟嘞！
小病是福，董團夥禍港，香港又豈止係小病！若然係小病，大陸又何須屍爬自由行長期吊鹽水！大言不慚，死性不改，全港市民對住咁嘅劣質政治，幾時出生天？
傳真︰2623-9278
電郵︰