近排金牌娛樂揸弗人黃柏高旗下嘅三位男愛將鄭中基、方力申同古巨基都好旺桃花，鄭中基同方力申呢對同門兄弟分別同英皇Twins嘅蔡卓妍（阿Sa）與鍾欣桐（阿嬌）拍拖，唔少行內人重講笑話金牌同英皇就嚟成親家。
方力申之前同Stephy傳緋聞，𠵱家有阿嬌正印現身，至於Stephy，噚日就有周刊報道佢介入古巨基同緋聞女助手之間嘅戀情，基仔同Stephy就一齊透過經理人公司否認。點知基仔噚日喺尖沙嘴出席新年醒獅活動時，被大會送佢紅底褲同避孕禮盒作禮物。對於方力申蜜運一事基仔就話冇留意，佢話平日同方力申只講打機，唔講女人。
至於阿嬌同方力申前日喺瑞士拍拖滑雪後返港，噚日各自復工，阿嬌同阿Sa晨早去到赤鱲角機場，出發到台灣錄音。阿嬌被在場記者追問佢同方力申嘅戀情時十問九唔應，只係發𤷪𤺧話：「唔答呀！」阿Sa多得拍檔被爆新戀情，令佢同鄭中基嘅緋聞被轉移視線，所以佢就笑得出啦，問阿Sa知唔知阿嬌同方力申拍拖？佢又詐儍話：「吓？我冇回應喎。」
呢頭阿嬌發𤷪𤺧，嗰頭嘅方力申就尷尷尬尬咁出席喺銅鑼灣舉行嘅「金龍醒獅賀新歲」慶典，方力申被司儀勁玩，佢話希望自己新年身體健康，司儀就笑佢𠵱家有多個人照顧佢，健康會好㗎啦，但方力申依然否認拍拖，一講阿嬌就左閃右避，至於發展機會，佢就話：「同任何人都有發展機會。」問佢一旦拍拖會否公開？方力申話：「要有默契，公開要雙方同意。」
施明喺九四年信奉密宗，重皈依埋，佢兩個仔受佢影響亦都皈依咗，有埋法號，前晚喺尖沙嘴有個新春祈福菩堤齋宴，並賀至尊上師土登巴絨仁波切七十大壽。
原來呢位仁波切就係施明嘅師父，施明帶埋兩個仔李永豪同李泳漢一齊出席，佢話雖然係情人節，但梗係師父大壽緊要啲，所以個仔永豪冇同女友楊思琦慶祝，都要嚟賀上師，況且楊思琦亦受男友影響，一齊信奉密宗。
噚日嘅情人節，鄭裕玲唔只淨係同男友呂方一齊，佢重約埋林建明夫婦、賈思樂食飯慶祝。
鄭裕玲話：「大家好耐冇見面，所以一齊食飯，我覺得情人節收吓花同朱古力係指定動作，都幾好玩，但係我冇送番禮物回禮。」講到方力申同鍾欣桐拍拖，鄭裕玲話：「後生仔拍拖好正常，只要正面面對問題就冇事。」
前Boy'z成員Kenny作個人發展後，身邊冇咗Steven，前晚佢同兩位男性友人去咗跑馬地食飯，Kenny話唔知前日係情人節，重話只係同兩個電台朋友私底下食飯，佢講笑話：「我冇女友呀，不如你哋介紹嚟識吓呀，你哋想影人拍拖呀，我即刻搵個女仔嚟扮情侶呀。」
