老董噚日依醫生吩咐，減少應酬，所以只出席禮賓府嘅酒會。八方睇番新聞處發放嘅短片，佢老哥講嘢真係好似遲鈍咗啲，不過，就仍然笑口騎騎，精神唔錯，霍英東同李超人都俾面出席。
咁啱八方噚日喺港大見到老董御醫、醫學院院長林兆鑫，佢話老董係唔應該太辛勞，感冒就要多休息，所以勸佢唔好周圍去，至於老董嘅身體就重係非常弗。八方想追問落去，林醫生就以不談病人私隱為由，唔肯多講。
老董病咗，肥平就好似做咗代特首咁發言，重大拋書包，兩次引述《孟子》，加埋唐代詩人李賀嘅詩句「雄雞一聲天下白」，祝賀香港前景光明，百業興旺。
嗰兩句《孟子》，一句來自〈公孫丑下篇〉嘅「天時不如地利，地利不如人和。」另一句就係來自〈盡心篇〉嘅「親親而仁民，仁民而愛物。」但肥平同長毛一樣，有時都會拋錯書包，肥平就將第二句講成「親親而仁『人』，仁『人』而愛物。」人同民都係差唔多，反正肥平乜都拗番生，一定唔會有錯。
（圖）老董抱恙出席酒會，全晚笑騎騎。
傳真︰2623-9278
電郵︰