六叔邵逸夫昨日跟一眾無綫員工團拜，三位應屆港姐中以亞軍朱慧敏最積極，向六叔大獻殷勤，更以請教上海話為名成功搶位，得到對方注意，六叔拍她大髀之餘，更即場問朱慧敏的電話號碼。備受冷落的冠軍徐子珊則稱不好意思太親近六叔，似另有所指。
無綫昨日舉行乙酉年新春團拜，六叔邵逸夫跟太太方逸華在將軍澳電視廣播城跟員工見面，一如以往，三位應屆港姐肩負照顧六叔的責任，在團拜期間侍奉左右。六叔抵達電視城後，冠軍徐子珊和亞軍朱慧敏第一時間上前攙扶，靠邊站的季軍符思思向六叔講句恭喜說話後，便被擠到大後方。
六叔甫就座，朱慧敏即祝他萬壽無疆，𠱁得六叔用上海話講「大家開心」。朱慧敏細心體貼，不時主動跟六叔說話，還多番向他請教上海話，又幫六叔把講詞放回衫袋內，更替六叔玩Bingo遊戲。六叔對朱慧敏的表現相當滿意，還拍朱慧敏的大髀，之後他更主動詢問朱慧敏的電話號碼，相約日後再聚。
朱慧敏其後說：「可能我成日撩六叔講嘢，我又叫六叔教我上海話，其實我放假嗰陣特登去圖書館借有關講上海話嘅書。我唔係因為要同六叔講，係因為我覺得上海商機多，咁啱趁呢個機會向六叔請教。」成功貼近六叔，朱慧敏會否擔心徐子珊不高興？她說：「唔會，我係出自真心，唔係因為利益同階級先咁做，平時我對大家都好好。」
徐子珊雖同樣負責照顧六叔，不過似乎未夠主動，又缺乏耐性，六叔最終將所有注意放在朱慧敏身上，徐子珊看來大感不是味兒，更一度扁嘴。問徐子珊是否一向不懂跟老人家相處，她反問記者說：「點解咁講？」沉默一會，她再說：「因為阿Sir（六叔）不嬲聽嘢唔係好清楚，我又唔知應唔應該同佢講咁多嘢，之前冇人同我講。」
平日積極進取的徐子珊，今次為何錯失良機，不跟六叔多多溝通呢？她說：「我唔知，每次見六叔聽我哋講嘢都好辛苦，佢老人家，我又唔好意思𦧲咁埋，好尷尬。」被朱慧敏搶位，徐子珊有否不高興？她說：「咁大家坐隔籬，我唔排除Queenie（朱慧敏）識得同老人家相處多啲，佢同老人家住嘛。」
季軍符思思被安排坐在方逸華的旁邊，思思說：「我話要減肥，方小姐重教我一個減肥餐單，我諗住聽日就即刻開始。」被問到沒有機會跟六叔溝通，思思說：「六叔落車我都有同佢拜年，希望佢身體健康，生日快樂。」至於被搶鏡一事，她說：「我唔驚，唔係講搶位，最緊要係畀心機做嘢。」
此外，對於有報道指白韻琴因為跟方逸華稔熟，所以《香港直播》辭退陳海琪後，由謝偉俊代替，方小姐說：「我都唔知有咁嘅事，都係你哋話畀我知。」
採訪：楊潔雯
攝影：陳慧安
