荷李活靚仔明星里安納度狄卡比奧（LeonardoDiCaprio）喺馬田史高西斯（MartinScorsese）執導嘅《娛樂大亨》入面飾演美國一代富豪侯活曉士（HowardHughes），更憑此片角逐今屆奧斯卡「最佳男主角」。里安納度為咗演繹侯活患有強迫症時嘅瘋狂狀態，重會全裸演出。
里安納度今次演出絕對係交足功課，佢為咗演活患有強迫症嘅侯活啲奇怪行徑，除咗努力模仿侯活嘅口音之外，亦犧牲埋色相，留晒鬚同除晒衫咁面對鏡頭，相當專業。侯活喺強迫症發作嗰陣，會反鎖自己喺黑暗嘅閣樓度，又會將飲完牛奶嘅樽排放得好整齊，用嚟儲起一啲都唔「小」嘅小便。有時佢重會全身赤裸企起身掟嘢㖭！我羅拉睇呢幕時，都睇到眼都唔眨呀！
提到強迫症，里安納度就話自己亦有輕微症狀，佢每次喺路上見到有香口膠迹，都會忍唔住踩一腳上去，佢又話為咗唔影響到生活，惟有努力咁控制住自己喎。