被視為本地貨Van界車霸的豐田Hiace系列，推出至今達十多年之久，可算係一款既可靠又耐看的客貨商用車系。早前，筆者曾講過話東瀛本土經已推出全新車款，但本港代理商卻遲遲未有新車消息。及後，經筆者打探過，原來代理要等廠方替新Hiace推出手波版關係，才計劃引進香港！
自動手波兼備
最後事情獲得圓滿解決，本港代理商的皇冠車行，已經鐵定於下星期二，率先讓傳媒跟新Hiace見面，既有自動波又有手波版型號，全數均以一台2.5公升柴油引擎（馬力109匹）作主打，雖然輸出未及早前登陸香港的日產新Urvan車系，但以Hiace一貫的可靠耐用性，早已累積有大班捧場客。
新貨已搶購一空
據知，新款Hiace未正式踏足香港前，首批新貨早已給訂購一空，皆因新車預售價，手波版不過賣18萬幾，而新加入的自動波型號，售價亦不過19萬幾，若然你係時候買車或換車的話，咁就要快步落去各大豐田Showroom查詢吓喇！
記者：陳偉林