八方噚日打電話畀《開放》雜誌嘅老總金鐘拜年，佢好勞氣咁話，都唔知乜事，澳門忽然唔畀佢入境，搞到佢非常掃興同覺得人權受侵犯。
事情發生喺情人節，金鐘帶埋由美返港度歲嘅太太毛雪萍同BB女準備去澳門玩一日，早上九點喺香港坐船出發，十點到達澳門，佢嘅美籍太太同BB順利入境，輪到佢，入境人員叫佢入咗一間房等，之後佢哋攞住金鐘嘅身份證影印本打電話同上司請示，跟住就同佢講，「你唔可以嚟澳門」。
金鐘梗係唔肯罷休，因為佢回歸後都去過澳門，全冇問題，今次乜嘢理由唔得？問極對方都唔肯答，佢只好要求出去大堂搵番老婆同個女，第一時間坐船走。
金鐘返港後，同澳門方面交涉，又向記協投訴，佢覺得自己個案好特別，因為連民主黨人士同長毛平日去澳門都冇事，莫非因為佢本雜誌最近寫咗啲胡主席同趙紫陽嘅報道得罪北京？咁樣澳門邊度重有一國兩制呢？
傳真︰2623-9278
電郵︰