肥仔Ｋ趁放假之便，飛去芝加哥探表妹，表妹係加拿大中學畢業生之中嘅狀元級人馬，精英中之精英，寧願放棄加拿大政府獎學金，唔讀加拿大大學，走咗去芝加哥大學。呢間名校認真國際化，學生來自全球五湖四海，叻仔叻女之多，數極數唔完。表妹自問讀書係前列分子，但見到一位十九歲半嘅同房讀咗兩年已經可以畢業，得教授推薦去哈佛讀博士，另外大把同學交朋結友開party，仍然攞晒Ａ，自己雖然好勤力咪書都要攞番一兩個Ｂ（其他全部Ａ），不禁自嘆不如，知道天外有天，亦都慶幸嚟咗芝加哥，否則重以為自己係了不起之天才。
表妹對肥仔Ｋ講：「最初本想讀生命科學，但芝大經濟系名氣太大，好多學生爭住選修，一讀就受吸引。我都唔例外，鎖定主修經濟學，因此讀完一科微積分，重要讀多一科高級微積分，呢科不見有數字，只係大堆希臘字母alpha、beta之類，啲同學一睇題目，就知道答案，我就要推算十幾分鐘，真係差人一皮。好彩，見到一位教授，知道猛人唔需要一定數學頂呱呱，有其他治學方法嘅，令我大為鼓舞。」
芝大久唔久就搞抽獎，中獎學生得到嘅獎品係同著名教授共進晚餐，聽佢演講，與佢討論。表妹夠運，抽中與一位StevenLevitt教授吃晚飯。呢位Levitt教授自認數學一般，寫論文全靠搜集大量實證理據，所寫題目全與現實生活有關，絕不抽象，未夠四十歲已經成名，被視為芝大經濟系另一位取得諾貝爾獎嘅熱門人選。Levitt教授研究學校考試作弊、老師幫學生作弊、日本相撲選手作弊、地產經紀與佣金及樓價之關係等等，篇篇論文都受學界重視，成為今日芝大最受學生歡迎嘅一位經濟學名師。表妹同佢食完飯，眼界大開，更有心機讀書，唔怕數學艱難。