港大噚日新春團拜，校長徐立之同一大班高層同埋學系教授都有參加。港大新春團拜其實都好有吃喝玩樂嘅港式小農作風，大食會不在話下，今年除咗繼續有BBQ外，重學咗新界農民傳統，整咗兩大盆盆菜應節。
徐校長親自夾盆菜畀記者，頗有劉皇發風采，港大公關大姐特登提醒佢千祈唔好夾「無情雞」畀人，咁就大吉利是喇。徐校長即時執生，選擇夾大蝦，咁就大家笑哈哈囉。
徐校長話，有兩個大計希望今年順順利利，一係取錄「非本地生」計劃，二係耗資達二十五億元嘅西部校舍擴建計劃，所以佢今年至鍾意嘅新年祝福語，就係東成西就。八方喺度亦要恭喜佢，因為佢搞嘅人類基因圖譜研究第二期，呢兩日就初步完成。
傳真︰2623-9278
電郵︰