八方噚日鬼咁忙，皆因要去大大小小嘅農曆新年酒會同團拜。民政喺會展新翼嘅酒會，八方見到財政司司長唐英年嘅媽媽唐老太都有嚟，梗係唔放過同佢拜年兼問幾句。
唐媽媽話，佢哋過年都喺香港，年三十晚就去咗仔仔唐唐屋企食飯，大年初一唐唐就一家大細返屋企拜年。年初二唐唐請記者食嘅茶葉蛋、棗泥蛋糕同蓮子茶，都係佢哋上海人嘅過年食品，一味好意頭，蓮子就祝大家連生貴子，茶葉蛋就因為佢似隻元寶，食咗就有得發啦。嘩，好彩八方兩樣都有食！
問唐媽媽有乜嘢新年祝願？佢話，希望香港雞年「平穩、安定同和諧」，咦，居然冇講到希望個仔做特首喎，真係奇嘞！
（圖）唐媽媽（中）同林貝聿嘉（右）、女童軍會總監李張慧美喺春節酒會相遇，影番張合照。
傳真︰2623-9278
電郵︰