今日係雞年首個交易日，小初希望各位股民順順利利，買個隻升個隻。
小初喺新年假期同經紀黃研究過，覺得繼澳門賭業股之後，家陣市場焦點會落在高息工業股中，其中上市唔算耐，但派息唔錯嘅力豐（387）係經紀黃心水之選，不過佢話可能要等一陣，唔可以即食。
力豐主要從事機床及相關產品貿易及安裝，去年9月公布中期業績時，由於盈利勁升1倍，加上有中期股息6仙派，息率高達11.54%，所以曾經炒過一陣，其後隨市況轉靜，但不久又重拾升勢。
隻股估計在3月份左右公布全年業績，如無意外應可保持增長，若能繼續高息政策，股價再創一次高峯亦唔出奇。力豐過年前收報1.30元，但成交稀疏，只得幾十萬銀。
另外，早排公布收購大陸傳媒的友利控股（419），在復牌首日股價勁升1倍，並保持凌厲後勁，過年前升至0.11元收市。經紀陳聽到有人周圍唱，話幕後炒家會繼續炒上去。
慕容小初