怪事年年有，今年新一件就係大埔林村許願樹大年初四突然斷折，壓傷一大一小。據講係前來拋寶牒上樹許願嘅善信太多，於是棵樹不勝負荷，自斷一臂以示抗議。今次事故，雖然只係樹毀人傷，未至於車毀人亡咁大劑，但都係唔吉利，應該請個高人去作作福，或者淋吓水，幫特區逢凶化吉。
咁搵邊個好呢？一眾八卦人馬上起哄，七嘴八舌，不過意見都好一致，就係肥局長何志平。一來冧樹呢單嘢係佢管轄範圍，屬民政事務，局長責無旁貸。二來喎，自從前年局長年初二求得下籤之後，車公廟香火鼎盛，啲籤靈到不得了。下亞厘畢道一眾大小AO，睇完「囊空不見舊同袍」之後，都唔敢唔信「持齋受戒須精致」。所以，溫村長不如化口舌之爭，請何局長大駕光臨，咁林村棵樹一定更紅，遊人更眾，大把生意，旺到隻生雞咁。
傳真︰2623-9278
電郵︰