早前英超聯球隊紐卡素拉隊去杜拜集訓，講到懶辛苦，又話要入住當地軍營，又話要日操夜操。點知佢哋俾英國傳媒踢爆，話佢哋不單止入住當地嘅高級酒店，重晚晚去頂級夜店豪飲兼同啲衣着性感嘅女仔跳辣身舞。
不過，最離譜嘅都算係紐記球員為咗走法律罅、唔受杜拜當地嘅禁止賭博法例管制，佢哋竟然請埋艇仔去杜拜，等佢哋可以下注當地嘅賽馬㖭！紐記對於上述嘅報道就一概不願置評；不過，佢哋喺杜拜返回英格蘭後，球隊上下又的確歡容咗好多，重話已為周中對海倫芬嘅歐協盃準備就緒。
但我求大俠就想問，紐記領隊桑拿士唔係一向以紀律嚴明見稱嘅咩？如果呢啲報道屬實，咁佢咪即係向球隊一貫嘅壞風氣、球員冇紀律兼大晒屈服？
西布朗呢隊波最近真係好黑仔，聯賽成日臨尾香；效力球隊多年嘅主將人馬好似門將侯特、基文迪等，最近先後表示季尾唔再留隊；前晚足總盃重賽作客熱刺，上半場打得好哋哋，突然間侯特輸個十二碼兼被踩傷離場，最後重反勝為敗出局。不如搵人過嚟拜吓車公轉吓運啦。
國際米蘭前晚主場對羅馬嘅聯賽大戰，老將米赫洛域包辦兩個靚靚罰球，做咗贏波功臣。本來佢都冇咁威，據講主射第二個罰球之前，隊友阿祖安奴想爭嚟射，最後竟要以猜「包剪槌」方式決定邊個射！嗰陣都只係贏緊一比○，重可以咁玩法，最後又真係入埋，服咗佢哋囉。
朗拿甸奴呢個世界足球先生真係好波，大家啱啱至喺大年初一，睇住佢喺香港大球場獻技，三日後返去西甲賽場，又帶領巴塞隆拿前晚作客贏薩拉戈薩四比一。我求大俠留意到「細哨」最近做多咗「nolookpass」，對香港時用完呢招，前晚又做咗一次助攻畀伊圖入楔。
澳洲網球手曉域治最近火速訂婚，點知佢嘅前未婚妻史施達絲都唔弱，原來已經同一位據稱曾贏過男性「選美」大獎嘅男教師行埋。我求大俠真係要向佢哋講個服字，大家分手唔到三個月，各自另結新歡，真唔知佢哋兩個係「性情中人」、拎得起放得低，抑或要向對方示威嘞！