大地產集團嘅Ｄ少傳來一紙《金剛經哲學的通俗詮釋》，講「一切有為法，如夢幻泡影，如露亦如電，應作如是觀。」
好玄噃，立即打電話畀Ｄ少：「喂，乜你咁番書仔都睇《金剛經》嘅咩，喺Berkeley修過通識課程呀？」Ｄ少話：「柏克萊圖書館收藏極豐，亞洲館嘅書多到你唔信，但我喺柏克萊之時，唔識人生哲學嘅，只識去三藩市尋找鮮花世代（theflowergeneration，聽一九六七年名曲《SanFrancisco》就知）嘅餘韻，追吓女仔。將近三十年後，發覺人生原是無常，好多事情唔使睇得咁緊張，一次行『商務』書局，就買咗呢本書，學習《金剛經》，睇睇吓，覺得好有意思。猴年已過，雞年到臨，人人講雞年運程、風水指數，無非為咗求名逐利，霍韜晦教授喺新城電台講到佛學創富與公司管治，有感而發，傳真呢四句佛偈畀你。」
人生便是如此，年輕時恐怕沒有財富，有不安全感，拚命工作賺錢，最叻嘅成為巨富，其他人成為小康階級，生活無憂，唔怕過唔到世，到呢個時候，回首前塵，就會覺得過往營營役役，猛咁炒金炒股炒樓炒期貨，大吃驚風散，僥倖過關上岸，意義為何？
偈文話：「這世界的一切景象，都離不開變化，無常的性格，像夢、幻、泡、影、露、電般，虛而不實，如幻如化，每一瞬間，它們都在消逝，又當下能引致新的景象生起，如是生生滅滅，循環無已……」
主要精神，便是萬事皆空，得不喜，失不憂，切勿強求，即使強求而得，最後亦如夢幻泡影。搵到大錢之後，留番一小份畀下一代，其他捐晒去造福世人，最為適當。