農曆新年八方遊咗去文化中心睇村校展覽，最記得新界神召會惠群學校有個女學生，好自豪咁話學校可以睇到大大嘅藍天，一般六、七層高嘅學校冇可能見得到。咁啱立法會議員余若薇（圖）早排都去咗呢間快將執笠嘅村校，佢見到啲小朋友讀得好開心，學校環境好靚、好優美，重有美麗嘅藍天，但係學校爭取咗成年都係被迫執笠，覺得好感觸。
點知噚日教統局常任秘書長羅范椒芬又喺網頁上講修身立志之道，提醒年輕人唔好將物質追求視為人生目標，利是錢要善用。睇到呢度八方真係好好奇，究竟羅范平時有冇提醒局長或者特首，納稅人啲錢唔好亂用，一手將啲村校揸乾揸淨，又將小班教學同埋師資培訓擺埋一邊，但另一隻手就係咁搞乜港、物九龍，送錢畀地產商，咁嘅邏輯八方真係好唔明。
傳真︰2623-9278
電郵︰