唔少行家覺得，𠵱家嘅警隊一哥李明逵唔夠上一手曾蔭培咁同新聞界合作，但佢就深得下屬夥計嘅民心。好似佢上個月喺獅子會午餐會演講，話有個叫陳志明嘅警員，比佢略矮，又冇成龍咁嘅身手，但就有一腔服務市民嘅熱誠同警隊專業嘅訓練。
李一哥好繪影繪聲咁講述呢個夥計嘅工作，話佢唔止捉賊、抄牌同查身份證，重要處理家庭糾紛、游說想自殺嘅人唔好輕生，又試過喺堆填區搵殘肢，大時大節冇得放假，早排重自願到布吉災區幫手，憂心忡忡嘅老婆仔女重到機場送別……到最後佢先至話，其實係將好多同事不同嘅經歷放喺「志明」身上，帶出警察嘅苦與樂，同工作多元化嘅一面。
八方聽聞，李明逵呢篇演詞喺警隊內引起好大迴響，好多人話有共鳴，冧到唔少下屬。警察招募組正諗緊用呢篇演詞做藍本，構思今年招募警察嘅宣傳招數。
傳真︰2623-9278
電郵︰