今日是杜汶澤和田蕊妮婚前最後一個情人節，回憶兩人過的第一個情人節，阿澤窮到燶，送花兼燭光晚餐，整日花費不超過一百元。後來阿澤搵到錢，在情人節雖送上昂貴禮物，卻被女友嫌沒有心思。
三十二歲的杜汶澤將於六月七日迎娶拍拖六年、二十七歲的女友田蕊妮，今個情人節對兩人來說特別有意思，因為是兩人婚前的最後一個情人節。恰巧今年的情人節又是年初六，本報率先邀請兩人着上唐裝，和大家分享一個非常情人節。
杜汶澤表示今年情人節一切從簡，兩人會在家中煮飯，靜靜地度過。回想起來，最令阿澤難忘的，是兩人度過的第一個情人節，當時他是亞視小藝員，經濟拮据。阿澤說：「嗰陣我窮到燶，記得嗰日晨早我去咗花墟買咗一支玫瑰，價錢係十五蚊，然後打電話畀佢，話畀佢知我前個晚漏咗啲嘢喺佢架車度，問佢攞咗條車匙，我將支花插喺Perrier嘅空樽入面，再加啲水放喺佢車度，諗住佢一揸車就會見到。」
阿澤續說：「嗰晚我請咗佢嚟我屋企，我煮咗餐飯畀佢食，有魚有肉有菜，重有蛋糕，喺餅店買嗰啲細細件蛋糕，重吹埋蠟燭㖭，成件事加埋唔使一百蚊。田蕊妮同我講，呢個情人節係佢過得最滿意嘅情人節，因為之後我搵到錢，情人節送襯埋佢都係一啲比較昂貴嘅禮物，唔會再花咁多心思。我哋呢啲老粗，覺得物輕情義重係假嘅，搵到錢梗係送得愈貴重愈代表到心意啦，但係對方唔係咁諗。今年情人節，我哋諗住一切從簡，喺屋企煮餐飯，買吓花咁咯。」
而田蕊妮表示自己除了這個情人節之外，其他和阿澤一起度過的情人節幾乎全部忘了，她說：「我只係記得第一個情人節最開心，佢肯花心思好難得。我重未諗到情人節送乜畀佢，應該會畫張卡送畀佢，我畫畫都OK㗎，以前讀書都貼過吓堂。」
採訪：張止寒
攝影：陳志嵐
場地提供：旺角朗豪酒店ThePlace
服裝提供：上海灘
