前日睇完騎士對金塊的比賽，之後返酒店又傳相又寫稿，結果要成五點鐘先有得瞓；不過今日九點就已經彈起身，預備去睇騎士操練。點解咁精神？全因見到出面陽光普照所致。
記得上個月喺香港，試過氣溫急跌到得幾度，當時個個都着到成隻糭咁，而我就自恃做開運動，都唔使着得太誇張；點知來到動輒零下十幾度的克利夫蘭，就真係由頭包到落腳都頂唔順。所以今朝起身見到太陽，即時覺得好溫暖，人都精神晒。步行去場館途中，見到路邊一個顯示牌，顯示今日氣溫有成攝氏三度，先醒起原來到咗克利夫蘭之後，今日先首次感受到非零度以下的滋味。
完成上午的採訪，又有時間可以周圍逛逛，當然要趁機shopping吓。走進商場，唔少舖頭都已經為情人節做好準備，堆滿寫上示愛字樣的禮物。獨在異鄉為異客的我，當然唔會有心機睇；好彩最後係商場的FoodCourt，重有九十年代係騎士叱咤一時的白人神射手派斯（MarkPrice）陪我食飯，先冇咁寂寞。