新春開市，先祝各位讀者乙酉雞年長賺長有，買股票隻隻都聞雞起舞，愈舞愈高。
港股家吓進入牛市第2期，大市有調整，冇大跌，趨向個別發展，實力股上升，冇實力嘅股票就回落。大市每一次調整，都係低吸嘅大好機會，到進入牛市第3期，恒指有機會上衝15500至16000點，百花齊放的場面亦會出現。
大行同基金今次收集得好有耐性，藍籌股因為要用來造期指，暫時只會係反覆上落，但國企同紅籌股就㩒唔住，紛紛破位而上，有貨在手者，短線可以玩波幅，中線可繼續持有，目標係賺多2至3成。
新年流流，買股要講好意頭，今日首先推介隻「發易發」，就係王朝酒業（828），明日講隻「生生發」，即係上海石化（338），預期兩隻股票雞年都有機會升1至2成。
王朝發售3億股，以上限2.25元招股，上市後股價強勁，最低2.90元，最高3.575元，升幅近60%，係近期上市表現最佳的新股。由於市場反應理想，保薦人行使超額配股權，公司再發售多4500萬新股，完成後大股東FamousEver持5.58億股（佔44.82%），人頭馬亞太持2.97億股（23.86%）、英得利4500萬股（3.61%），以及公眾股東3.45億股（27.71%）。
公司上市時預計2004年度（12月年結）盈利不少於1.75億元人民幣，升40.6%，每股基本盈利不少於0.18港元，現價計PE約20倍。
王朝PE不算特別吸引，與國際同業之平均數相若，但中國葡萄酒市場發展潛力大，王朝在截至03年止的7年內，有6年為中國葡萄酒銷量第一，03年則屈居張裕集團而列次席，不過王朝上市集資後，將會全力擴充，06年產能由現時3.2萬噸增到5萬噸，不難再在競爭劇烈的市場中重奪優勢。
王朝係第一隻獨立上市的紅酒股，有頗大機會成為基金股，以啤酒股如青島啤（168）和金威啤（124）約35倍的PE而論，王朝PE不難去到25至30倍水平。05年度，王朝盈利估約2億元，每股盈利0.152港元（因新股上市攤薄），以28倍PE計，股價可見4.25元。
郭兆誠