車公每年畀支籤，出晒名靈，視乎有冇人蓄意曲解！今年嗰一支中籤，由新界王劉皇發求得，籤文亦好得人驚：「持齋受戒須精致，盛積爐烟荐聖賢，香火滿堂皆顯應，何勞經卷往西天。」
支籤好明白，一啲都唔難拆！第一句：「持齋受戒須精致」，就係衝着廢董而來！「持齋受戒」，梗係指廢董澳門遭受壽爺嚴詞訓斥「查找不足」事件。廢董受完誡斥之後，並無深入查找不足，反應極之粗糙，所以勞動到紅曾南美洲再醒多一鑊。車公呢句籤文，叫廢董繼續查找不足，自我檢討！
廢董處境，香港冇乜人關心，反而最想車公畀貼士，下屆特首會係邊個？呢，貼士就在第二句之中嘞：「盛積爐烟荐聖賢」，香港又名「香爐峯」，呢一句，即是話下屆特首，一定要係香港本土人士，「盛積爐烟」，即是該位人士，喺香港要出身世家，世世代代靠香港發迹，而唔可以係外來者諸如上海佬！
「聖賢」指「聖賢書」，正所謂「讀聖賢書，所為何事」，因此下屆特首，應該係出身教育界、又係主管教育嘅。出身爐峯世家，烟積三代，又係聖賢所荐，除咗李國章，又有可能係邊個呢？
加埋太子章開口埋口，最鍾意引述孟子喎！咁車公聖賢之說，又多一個依據嘞！咦，煲呔話○七年佢會告老歸田，有讓位之意喎，車公講到明，下屆特首，太子章係最佳人選㖭！
後兩句，就重清楚㖭！「香火滿堂皆顯應」，車公話：香港本來大把治港人才，「何勞經卷往西天」，咁又何須廢董做唐三藏，完成西天取經使命？呢一句亦有一層意思：何勞唐三藏去西天取經，即是下屆特首，亦毋須勞煩「唐唐」嘞，就算太子章唔肯做，都有大把香火，透過秘密渠道爭住燒畀北京中央人民政府博上位喎！
車公支雞年籤，真係好神奇！車公嘅貼士，港人收到嘞，多謝車公顯靈呀！
（圖）李國章
傳真︰2623-9278
電郵︰