今日是情人節，由於佘詩曼要拍劇，故她會在工作中度過佳節，日前她亦已揚言不會跟陳浩民在情人節會面，寧願跟好友交換情人節禮物。阿佘又笑言不恨有桃花，反而恨賺錢，寄望新一年能身體健康搵真銀。
佘詩曼於今個農曆新年依然忙個不停，初一要返無綫出席拜年活動，初四又要拍攝劇集《YummyYummy》和《隨時候命》，就算情人節也不能幸免，照樣要開工。
問阿佘會否與緋聞男友陳浩民吃飯共度今日情人節？她日前耍手擰頭地說：「千祈唔好，未係時候唔好做啲係時候嘅嘢，我冇諗過呢樣嘢好多年，所有節日我都要開工，情人節、生日、過年、聖誕都一定係拍嘢嘅。」
眼看別人有影皆雙，阿佘豈非很可憐？她說：「唔會，公司唔知幾多人，女仔之間都可以送禮，又有fans同同事，重有朋友送朱古力畀我食。」
由於阿佘的家人在外地居住，故此獨居的阿佘對新年一向沒多大感覺，只會在年初一穿新衣以及到泰國拜四面佛。問阿佘為何不希望真命天子盡快現身？她說：「冇求呢樣，隨緣啦，我唔急。」
問阿佘有否買桃花增桃花運？她馬上笑道：「啲花瓣係咁跌落嚟，掃到手軟都未掃完呀。咁麻煩，咪搞！極其量都係買盆水仙。」
阿佘表示不恨桃花，反而較恨錢，她說：「我對𠵱家嘅收入都滿意嘅，希望可以再好啲啦，咁我都有諗過搞吓小生意，最好搞飲食，因為自己鍾意食嘢，同朋友又有個聚腳點，但真係冇時間，又唔可以交晒畀人睇，力不到不為財，遲吓再諗啦。」
採訪：朱倬誼
攝影：何國豪
服裝：SistyrMoon
