噚日商台主席何驥、副主席俞琤、聯同一眾ＤＪ喺商台向大家拜年，ＤＪ坐住迷你雞形花車出場，現場重放炮仗，一位收音師不幸俾炮仗燒燶咗少少頭髮，商台話往年都有放過呢類炮仗，係合法嘅。
谷祖琳、倪震同黃毓民喺現場派金蛋，谷祖琳着咗件紅色長裙，上面有幾個男人嘅公仔圖案，露出埋何B仔，相當惹笑，之後谷祖琳就去咗銅鑼灣出席Evra避孕貼宣傳活動，佢話自己都想試吓呢隻新產品，佢話平時嘅避孕方法都係用避孕套或者食避孕丸，不過又話有時同男友親熱，都唔想咁有隔膜喎，講到結婚，谷祖琳就話起碼係十年後嘅事。而倪震就話今日情人節會同周慧敏去銅鑼灣食日本嘢慶祝。
另外，商台總經理陳靜嫻透露今年903台將會組成「熱火樂團」，薛凱琪、劉浩龍、余文樂同Cookies嘅Kary四人將各開一場音樂會，第五場就眾人合唱。而拉闊音樂會會由五月五日開始舉行四場，第一場係FIR表演，孫燕姿擔任嘉賓，第二場係at17同Twins，第三場係楊千嬅加林一峰，陳奕迅會喺十一月一日壓軸個人表演，另外黃貫中同周國賢亦會分別舉行狂迷音樂會。
張栢芝農曆年期間同陳小春、曾志偉去咗拉斯維加斯登台，入座觀眾有二千幾人，氣氛非常熱鬧，而栢芝更大唱多首首本名曲，大受觀眾歡迎，而小春則擔任壓軸嘉賓，佢哋除咗唱歌外，重同觀眾大玩遊戲同抽獎，表演完後，佢哋入咗賭場玩兩手，大發新年財。
噚日大年初五，好多人趁住新年假期最後衝刺，四出同屋企人食飯兼拜年，富商劉鑾雄噚日就同女友呂麗君去咗灣仔富豪飯堂福臨門食飯，不過就冇見大劉媽咪出現，而大劉走時買咗一大袋外賣，吩咐司機派利是畀飯店員工㖭。
周杰倫拍完寰亞電影公司部《頭文字D》後，劉偉強同麥兆輝𠵱家又籌備緊一部音樂愛情片，男主角都係鎖定周杰倫，喺部戲入面，佢飾演一位鋼琴家，而女主角方面雖然有人提議用周杰倫緋聞女友蔡依林，但唔知呢對緋聞情侶肯唔肯一齊合作拍呢部戲呢？
國際著名歌星RobertaFlack今晚會喺會展舉行演唱會，噚日佢同傳媒見面，佢嘅忠實fans林一峰都有到場，林憶蓮曾經將佢首《andsoitgoes》改編為廣東歌《微涼》，林一峰亦有翻唱，難得有機會同偶像見面，林一峰除帶齊所有CD畀偶像簽名外，亦都送自己嘅CD畀偶像，RobertaFlack同林一峰一見如故，不停拖住佢影合照。
梁洛施（Isabella）噚日喺沙田出席「與Isabella最合拍情人大賽」，想同Isabella做情人嘅原來唔只係男fans，連女仔都有。
Isabella話新年返咗澳門同屋企人過年，收到好多利是，連行街嗰陣遇到啲唔識嘅人都會畀利是佢，不過老闆楊受成嗰封利是就重未收到。
