新年期間，舞獅係最受歡迎嘅應節活動之一，新地恒基嘅中環國際金融中心商場，噚日舞獅舞龍賀歲，重有全港最高桃花樹王陪襯。
表演場地雖然唔算大，一龍三獅仍然活動自如，其中醒獅一環，但見獅子喺個梅花樁之間輕鬆高縱低竄，如履平地，完全冇難度，難怪現場中外人士不時報以掌聲，讚歎不已。
國金管理公司總經理文靜芝話，為咗凸顯商場「第一」形象，要求夏德建獅隊，出動新造嘅一龍三獅，呢隊獅重係世界冠軍㖭。加埋棵嚟自內地、全港最高桃花樹王，文小姐對噚日嘅活動梗係滿意啦！
蘭西問夏德建師傅，佢話一龍三獅係喺星馬訂返嚟，因為兩地手工同用料都好啲。佢又話，噚日嘅獅隊，由○二年起已經連奪四屆世界醒獅大賽冠軍，負責舞獅頭嗰位，四歲就開始受訓。
九龍塘施他佛道多為洋房，動輒四五千呎，入場費至少三四千萬，地段之矜貴，喺區內數一數二，惟獨施他佛道十號四座排屋，每座只得千五呎，與左鄰右里明顯不同，因而成為聞名區內外嘅「細價樓」。
其中一座放售，即時吸引外區換樓客慕名而至，只係考慮幾日就扑槌。由於盤源罕有，只此一伙，買家為免夜長夢多，又驚業主反價，又怕有對手，不惜喺新春假期拍板，以千五萬購入，每呎一萬。
中原又一村分行楊思煒話，施他佛道再無同類放盤，現時至少要出到雙倍價錢，先至有機會進駐。
代理行之間舊年既要鬥業績，又要喺各種比賽中爭冠軍，競爭都幾激烈。除咗發展商搞賣樓比賽，原來銀行都有辦銷售代理比賽，滙豐日前頒發「○四年最佳銀主盤銷售表現大獎」，由美記奪得。
美聯測量部行政總裁張一輝預期，由於整體樓市向好，銀主盤陸續消化。
講開美記測量行，佢哋今日會公布成立澳門分行，聽講原因係有唔少國際投資者想進軍，但唔熟行情。係咁，美記澳門測量師行肯定唔憂做。
本港市民重建消費信心，加上自由行效應，搞到商舖買賣火熱，上個月全港合共錄得七百五十宗商舖買賣登記，總值四十二億幾，連續兩個月都高於七百宗同四十億，係有史以嚟第一次。
利嘉閣周滿傑話，上月價值一千萬元或以上嘅商舖買賣登記，有九十二宗，比舊年十二月多出一成八。由於多個商場拆細出售，刺激到二百萬元以下商舖交投超過四百宗。
睇番買賣價值最高嘅十宗成交，尖沙嘴佔去三宗，重係包辦晒所有過億元超大額成交㖭，其他最貴都係得八千零萬。
農曆新年假日氣氛仍未減退，中記趁冇咁忙，揀噚日喺將軍澳廣場會所，同傳媒舉行籃球友誼賽，中原集團主席施永青，攜同埋太座及一對寶貝仔女到場。
施太主持開球儀式，佢嘅仔仔就落場幫傳媒隊。
傳媒隊一度領先，但中原隊後來居上，最後贏埋，由施太頒獎畀中原一姐劉瑛琳。
雖然之前扭傷，但一向打開羽毛球嘅施太，喺籃球賽之後，忍唔住落場打番一陣羽毛球，身手仍然矯健。
中午時段，中記安排傳媒同發展商春茗，有八家發展商到場，等老記乘機問吓市況，結果有功課交，認真識做。
電郵地址：
