恭祝讀者雞年行大運，身壯力健，日日有錢搵。春節港市休息期間，美股掂檔，杜指4日內共升81點。港股雞年紅盤靚靚睇嚟冇乜走雞。滙控（005）紐約收報84.97美元，折合132.50元，較港市131元再升1.50元，揸咗滙控C輪嘅有運行，上周一推介嘅4441，猴年最後日半升幅42%，繼續升多一升。
和黃C輪3561：和黃（013）猴年跑贏大市，3G播種期已捱完，雞年ARPU開始唔使再蝕，有機會雞年繼續跑贏大市，上周二收70.25元，好快再試高位73.50元。吼住有平貨執啲C輪，對象係3561。
3561喺6月中夠鐘，輪價42.5仙，溢價2.9%，槓桿率16.5倍（有效9.6倍），引伸波幅22.6%。呢件數據唔錯，交投熱鬧，易買易賣，萬一睇錯正股，隻輪要甩手亦全無困難。
華創C輪2201：04年底之前一段日子，華創（291）好強，過去個零月，則比較弱，最低價11元，上周二收11.20元，只係高過最低價少少，博跑番快啲，買C輪2201。
2201近期處低位，輪價19.7仙，高過最低位18.9仙好少，距離上月高位29.5仙好多。隻輪明年3月夠鐘，大把時間，溢價5.8%，槓桿率5.7倍（有效4倍），引伸波幅30.5%，年三十晚半日市成交量大增2.8倍，價低吸引買家收貨。
中信C輪4483：中信泰富（267）一級級升，炒C輪，揀4483，隻輪10月到期，輪價19.7仙，溢價4.3%，槓桿率11.2倍（有效6.2倍），引伸波幅27.5%。
章盛