今日係大年初六，適逢情人節，大使喺呢度恭祝各位身體健康，生活愉快，而情侶們就恩恩愛愛，白頭到老。
本港經濟好轉，市道暢旺，今個農曆年終於有番啲過節氣氛，大家手頭鬆咗，唔單止願意多消費，利是嘅「內涵」亦有所提升。以大使本人同身邊嘅朋友為例，今年收到嘅利是比往年多，增幅有兩成，真係可喜可賀。
不過，多收嘅利是大使冇諗住自己袋埋，所謂行善積福，大使老早同一班好友約定，新正頭第一件要做嘅善事，就係要將多收嘅利是捐畀慈善機構，無論捐畀蘋果日報慈善基金抑或其他慈善團體，大使同樣鼓勵，試諗吓香港有近七百萬人口，只要每人捐出一封十蚊利是，社會就可以滙集到七千萬元善款，令更多有需要嘅貧苦大眾得到幫助。
大家除咗捐利是之外，亦可以考慮捐出收到嘅賀年禮盒。大使知道，每逢過年後，好多人屋企都會囤積大量糖果、餅乾等禮物，與其浪費或者食滯，不如轉送畀弱勢社群，等佢哋都有機會感受新年氣氛。
暖流熱線
電話：29908688
傳真：23702192
電郵：
網址：