綿羊可以代步、可以遊車河，估唔到重可以撮合一PairPair甜蜜情侶。呢幾對綿羊情侶有因為揸綿羊而相識嘅、有為咗另一半而換上同款情侶車、亦有為迎合男友興趣而自投羊網嘅羊女！總之三Pair情侶嘅情史之中都有綿羊作調味，令佢哋原本甜蜜嘅關係更加甜蜜。
記者：馬慶武 攝影：楊錦文、陳偉強
鳴謝：綿羊谷（www.scootersgroup.org.hk）管理員小夢
志趣相投齊「牧羊」
扭快啲劈勁啲，車尾女乘客愈驚就攬得愈實，攬得實自然好快好親密！揸綿羊追女仔唔出奇，感覺上重好似易啲多機會啲㖭！不過今次訪問呢幾對情侶，女仔就唔再係坐車尾，而係志趣相投齊齊「牧羊」。當中一PairG-Max情侶車當然係襯絕，就算唔同車款，亦有情侶裝飾、改裝配件搭夠。不過講到最重要都係可以結伴出車，上山去海灘都雙羊齊出，再唔係雙騎出擊，你載吓我、我又攬吓你，真係好癡纏㗎！
Polly＆小達子 賣新車換情侶羊
情侶鞋、情侶表，甚至全套情侶裝都見過，情侶羊就真係第一次見！本身揸Forza嘅小達子同揸開ET8嘅Polly，係喺綿羊車會出車活動認識嘅，之後愈玩愈熟愈見愈鍾意，順理成章發展成為情侶關係。拍咗拖無耐，佢哋將新買無耐嘅車賣咗，一齊換咗PGOG-Max情侶羊。小達子話鍾意隻羊中置避震性能高，Polly就話貪有碟煞安全性高啲，但係計我話，佢哋最鍾意係可以凸顯情侶親密關係至真！
愛的印證：自製情侶貼紙
因為小達子重係P牌，所以如果雙騎出街，會係由Polly載小達子。
阿蝶＆Eddie 為男友自投「羊」網
今次訪問中唯一一對唔係因出車而認識嘅情侶。
「我哋識咗6、7年喇，唔係綿羊撮合我哋嘅！」
Eddie同阿蝶雖然唔係因為綿羊而認識，但係揸綿羊就直接令佢哋嘅關係更加親密。
「我都唔係特別鍾意揸綿羊，不過Eddie話佢要考車出羊，我咪陪佢囉，一齊學一齊玩開心啲嘛！」
揸開私家車嘅阿蝶係為咗迎合男友嘅興趣而考牌揸羊，Eddie當然要盡顯細心補番數：
「我同佢出車會幫佢護航，如果佢自己出車，我都會好擔心，成日煩佢，要佢小心啲。」
愛的印證：情侶匙扣車牌
■呢兩個情侶鎖匙扣就係佢哋一齊參加嘅車會——綿羊谷出品，佢哋話聽講呢個谷已經孕育咗唔少綿羊情侶！
■兩隻羊無乜情侶裝飾，情侶主人身份只可以喺車牌冧巴同螺絲度發現。
Carmen＆Charles 甘做男人背後女人
Charles同Carmen兩個都揸唔同羊，而且奇怪在車內車外都發現唔到有情侶裝飾。
「都唔係㗎，Carmen以前戴開面頭盔，𠵱家為咗襯番我都換咗個FullFace頭盔。」Charles重話：「我哋有共同嗜好咪得囉，況且我哋都唔係成日一齊揸車出嚟，多數我載佢多。」Carman亦都唔鍾意揸情侶車：「佢（Charles）架AN600個座位咁大，重有椅背，坐得咁舒服！我唔畀佢換車㗎！」
愛的印證：鍾情男友羊「股」
Carmen最鍾意嘅羊「股」，有椅背，坐得舒服又好有安全感。
